Надежда Давидян - Даймохк

Мехках ваьнна арахь лелаш
Моллаг1а х1ама дайча,
Се цу мехка волаш санна,
Даймохк дагаухар сона.

К1айча боамбе apг1aш санна,
Сайса морхаш яйча,
Царех нана-лоамаш хийте,
Даймохк дагаухар сона.
Баь т1а даьржа жа 1ул санна,
Лакхе седкъий дайча,
Наьсаренгахь уйла лесте,
Даймохк дагаухар сона.
Къонах, кхалсаг, е бер денна
1аьржа таьзет дайча,
Наьна из боарз духьалъэтте,
Даймохк дагаухар сона.
Новкъа ваьнна, ший ды коачбаь
Водаш баьри вайча.
Къона шераш духьалдаьхке,
Даймохк дагаухар сона.
Саготонах х1ама доацаш
Ловзаш бераш дайча,
Айса барзан когаш лийза
Даймохк дагаухар сона.
Нийса муг1 баь, г1apaг1ypaш
Йолхаш-йоаг1аш яйча,
Б1аьха никъ баь се гаьнваьнна
Даймохк дагаухар сона,
Даг1а долхаш е ц1адоаг1аш
Дерста хьаьлий дайча,
Дог ма 1абба беркатдола
Даймохк дагаухар сона.
Кино хьежа е сурта т1а
Хоза 1алам дайча,
Кхы а хозаг1а сибат дола
Даймохк дагаухар сона.
Товнаш санна боага ши б1арг
Миччахь б1аргабайча,
Сай дог хьийстар гучаяьле,
Даймохк дагаухар сона...